Олий ўқув юртидан кейинги таълим жамиятнинг олий малакали илмий ва илмий-педагог кадрларга бўлган эҳтиёжларини қондиришга, шахснинг ижодий таълим-касб-ҳунар манфаатларини қаноатлантиришга қаратилган.

Олий ўқув юртидан кейинги таълимни олий ўқув юртларида ва илмий-тадқиқот муассасаларида (аспирантура, адъюнктура, докторантура, мустақил тадқиқотчилик) олиш мумкин. Олий ўқув юртидан кейинги таълим босқичлари (аспирантура, докторантура) диссертация ҳимояси билан якунланади.

Якуний давлат аттестацяси натижаларига кўра тегишли равишда фан номзоди ва фан доктори илмий даражасси берилиб, давлат томонидан тасдиқланган намунадаги дипломлар топширилади.

Аспирантура (докторантура) тўғрисида Низом Ўзбекистон Республикасининг "Таълим тўғрисида", "Кадрлар тайёрлаш миллий дастури тўғрисида"ги қонунларига ҳамда Ўзбекистон Республикаси Президентининг 2006 йил 7 августдаги "Фан ва технологиялар ривожланишини мувофиқлаштириш ва бошқаришни такомиллаштириш чора-тадбирлари тўғрисида"ги ПҚ-436-сон қарорига мувофиқ олий ўқув юртидан кейинги таълимни аспирантура, адъюнктура ва докторантура орқали ёки мустақил таълим шаклида ташкил этиш ҳамда олий малакали илмий ва илмий-педагог кадрларни тайёрлаш тартибини белгилайди.

Ушбу Низом олий таълим ва илмий-тадқиқот муассасасида аспирантура (адъюнктура) ва докторантура фаолиятини тартибга солади ва иштирокчиларнинг (аспирантура ва доктарантурага эга олий таълим ва илмий-тадқиқот муассасалар, аспирантурага йўлловчи олий таълим, илмий-тадқиқот муассасаси ва ташкилотлар, аспирантлар, илмий раҳбарлар ва илмий маслаҳатчилар) ҳуқуқ ва мажбуриятларини белгилаб беради.